به‌ره‌و پێنجه‌مین مۆندیالی هه‌رێمه‌كان (1) چۆنێتی دروستبوونی ئێن ئێف بۆرد

به‌ره‌و پێنجه‌مین مۆندیالی هه‌رێمه‌كان (1) چۆنێتی دروستبوونی ئێن ئێف بۆرد

ئێن ئێف بۆرد (N.F.Board) كورتكراوه‌ی ناوی ئه‌نجومه‌نی نوێی فیدراسیۆنی تۆپی پێ‌-یه‌ كه‌ به‌فه‌ڕه‌نسی (Nouvelle Federation-Board) ده‌كات، ئامانجی ئه‌نجومه‌نه‌كه‌ كۆكردنه‌وه‌ و سه‌رپه‌رشتیكردنی یه‌كێتییه‌كانی تۆپی پێی كه‌مه‌ نه‌ته‌وه‌كانه‌ ئه‌وانه‌ی‌ خاوه‌نی‌ ئاڵای خۆیانن و له‌هه‌رێم و دوورگه‌ و میرنشینه‌كاندا ده‌ژین و ئه‌ندامی یه‌كێتی تۆپی پێی جیهانی (فیفا-FIFA) نین. ئه‌م رێكخراوه‌ رۆژی 12ی دیسه‌مبه‌ری ساڵی 2003 له‌شاری بروكسلی‌ پایته‌ختی به‌لجیكا دامه‌زراوه‌، جان لوك كیت-ی‌ فه‌ڕه‌نسی خاوه‌نی بیرۆكه‌ی‌ دروستبوونی رێكخراوه‌كه‌یه‌ و یه‌كه‌م ده‌سته‌ی‌ رێكخراوه‌كه‌ش له‌ كریستیان میكیلیس/ مۆناكۆی‌ فه‌ڕه‌نسا-سه‌رۆك و جان لوك كیت/ فه‌ڕه‌نسا-جێگری‌ سه‌رۆك و لوك میسون/ به‌لجیكا-سكرتێر و تێری‌ ماركادا/ فه‌ڕه‌نسا-ئه‌مینداریی دارایی و چه‌ند ئه‌ندامێكی تر پێكهاتبوو، به‌ڵام ئه‌م چوار كه‌سه‌ ده‌سته‌ی‌ دامه‌زرێنه‌ری‌ رێكخراوه‌كه‌ن، یه‌كه‌م كۆبوونه‌وه‌ی‌ ده‌سته‌ی‌ به‌ڕێوه‌بردنی رێكخراوه‌كه‌ش ساڵی 2005 له‌ له‌شاری له‌نده‌نی‌ ئینگلته‌را بووه‌ و باره‌گای‌ سه‌ره‌كی رێكخراوه‌كه‌ش له‌شاری لییاچ-ی‌ به‌لجیكایه‌ و وێب سایتی رێكخراوه‌كه‌ش له‌سه‌ر تۆڕی‌ ئینته‌رنێت (www.nf-board.com)ه‌.  ده‌سته‌ی‌ ئێستای ئه‌م فیدراسیۆنه‌ له‌ 15 ئه‌ندامی كۆمیته‌ی ته‌نفیزی پێكدێت، سه‌رۆكی فیدراسیۆنه‌كه‌ كریستیان میكیلیس-مۆناكۆی‌ فه‌ڕه‌نسا و جێگری سه‌رۆك كریستۆف كرۆز-فنله‌ندا و سكرتێر جان لۆك كیت-فه‌ڕه‌نسا و ئه‌مینداریی گشتی لۆك میسۆن-به‌لجیكا و ئه‌مینداریی دارایی جان پییار ئایرمۆل-فه‌ڕه‌نسا له‌گه‌ڵ 9 ئه‌ندامی كۆمیته‌ی‌ ته‌نفیزی كه‌ 3 ئه‌ندامیان به‌ئه‌ندامی تاك داده‌نرێن و نوێنه‌ری‌ هیچ یه‌كێتییه‌كی ناوخۆیی ئه‌ندامی‌ رێكخراوه‌كه‌ نین و یه‌كێكیان د.سه‌رهه‌نگ عه‌بدولخالق-ه‌ و 5 ئه‌ندامیشیان نوێنه‌رانی كیشوه‌ره‌كانن و یه‌كێكیان سه‌فین كانه‌بی سه‌رۆكی یه‌كێتی تۆپی پێی كوردستان-ه‌ كه‌ لێپرسراوی هه‌موو ئاسیایه‌. تائێستا یه‌كێتییه‌كانی تۆپی پێی 34 هه‌رێم و دوورگه‌ و میرنشین تیایدا ئه‌ندامی‌ كارا و به‌شدار و كاتین كه‌یه‌كێكیان یه‌كێتی تۆپی پێی هه‌رێمی كوردستانی عیراقه‌ و له‌ڕۆژی 29/6/2008 وه‌ك ئه‌ندام وه‌رگیراوه‌ و ئێستاش ئه‌ندامی چالاك و كارای (ئێن ئێف بۆرد)ه‌. ئه‌م فیدراسیۆنه‌ له‌ساڵی 2006-ه‌وه‌ پاڵه‌وانێتی جامی جیهانی ڤیڤا (VIVA World Cup) بۆ هه‌ڵبژارده‌ی‌ هه‌رێم و دوورگه‌ و میرنشین-ه‌كان رێكده‌خات، به‌مشێوه‌یه‌: -ساڵی 2006 یه‌كه‌م پاڵه‌وانێتی له‌ئۆكسیتانیا رێكخراوه‌ و هه‌ڵبژارده‌ی‌ سامیلاند یه‌كه‌م و هه‌ڵبژارده‌ی‌ ئیماره‌تی مۆناكۆ دووه‌م بووه‌. -دووه‌م پاڵه‌وانێتی ساڵی 2008 له‌سامیلاند رێكخراوه‌ و هه‌ڵبژارده‌ی‌ پادانیا یه‌كه‌م و هه‌ڵبژارده‌ی‌ ئه‌رمه‌نی و سریانی دووه‌م بووه‌. -هه‌مان ساڵ یه‌كه‌م مۆندیالی هه‌رێمه‌كان بۆ كچان كراوه‌ و سامیلاند یه‌كه‌م و كوردستان دووه‌م بووه‌.  -سێیه‌م پاڵه‌وانێتی ساڵی 2009 له‌پادانیا رێكخراوه‌ و هه‌ڵبژارده‌ی‌ پادانیا یه‌كه‌م و هه‌ڵبژارده‌ی‌ كوردستان دووه‌م بووه‌. -چواره‌م پاڵه‌وانێتی ساڵی 2010 له‌گۆزۆ رێكخراوه‌ و هه‌ڵبژارده‌ی‌ پادانیا یه‌كه‌م و هه‌ڵبژارده‌ی‌ كوردستان دووه‌م بووه‌. -هه‌مان ساڵ دووه‌م مۆندیالی هه‌رێمه‌كان بۆ كچان كراوه‌ و پادانیا یه‌كه‌م و گۆزۆ دووه‌م بووه‌. -پێنجه‌م پاڵه‌وانێتی ساڵی 2012 له‌كوردستان رێكده‌خرێت. -ساڵی‌ 2013 سێیه‌م مۆندیالی هه‌رێمه‌كان بۆ كچان له‌سامیلاند رێكده‌خرێت.